MAJANG
Olle olang paraona alajara, Olle olang alajara ka Madura
E bekto are ampon compet,
Oreng- oreng tase' ampon arapet
Ngampar lajar e tengga sangara.
Kaangguy majang areng bareng
Olle olang
Du'a eatoragi dha' Pangeran
Duwa ebaca e attas sampan
Sopaja juko' ta' ngetek e babana karang.
Saamponna badha e tengga tase'
Ora' ora' melantar
Naja' jaring se eampar
Ta' mekker tabu' maske lapar.
Dhu oreng majang.
Ce' raja babajana abandha nyaba
Kaangguy kaodhi'an tor bala tatangga
Malang 2023.
KAULE ORENG MADHURE
Paseser malathe ngapote e polo madhura
Se ampon kalonta kaloar ponca'na polo jhabe
Kaule nika oreng madhure ta' todus bhan ta' malo
Akantha accen rassa bujhana se theddhi ter- ater
E sabbhan- sabbhan naghare se atatanggha.
Madhure Mon nyamana, Olama' keae jhanur konenga
Sabhina sullam ngajhi santrena, sekken tor bhagus tatakramana
Madhure mon dhisana, bhegus ongghu lanceng parabhana
Meltas manjhalin mon palembeye, bennya' oreng dhu se ataretana.
Aeng mata saghara se teddhi nyolpu' kerrenga
Pangorebhan reng- oreng se odi' e madhura
Ojen tor panas, ombe rajha
Asapo' angin kacellebhan ta' teddhi panyellathan
Elen jhelen pangara ka angguy oreng madhure
Kaule nika oreng madhure, ajharing jhuko' ka polo jhaba
Paraona alajher dheri saghare, atane bhako padi anye satdhaje
Tan taretan kaule sathaje ngereng papade ajhagha
Malang 2023
MORED BUWANA ATE
Deddiya mored se becce' atena
Tengkana sopan alos gulina
Ta' alako juba' apa pole' sampek roce
Ta' pangga' ka Guru ngabdi songkemma
Ben ka reng towa dhuwa' se saomorra
Ka kanca ta' mergem, ka oreng ta' ngotem
Sala sakone' ta' salang santem.
Deddiya mored se becce' atena
Ta' daddi rasan, ta' lebur ngece
Mored se becce' ate akanta ate malan aguli
teppa' ta' maseyalan
Ta' akanca se matokaran, apa pole' apacaran
Deddiya mored se becce' atena
Tape bannya' se ta' ngastete
Tanang lancang lebur ngeco'
Ka Guru ta' andi' rassa tako'
E rammena oreng biasa akento'
Ngakan colo' ben nyator tepa' arassa poko'
Ja' paggune mi' ecapo' cangko'
Daggi' markoko'
Deddiya mored se becce' atena
Papangrasa ja' bakal mate
Ce' sakejja'na odhi' e Dunya
Patebbel iman, pabannya' amalla
Pasogi elmo se lebba' gunana
Ma' le bunga budhi arena
Kalaban ridho Allah azza wajalla.
Mandar dadddiya
Mored se becce' atena.
*Ahmad Rizal, kelahiran Republik Pulau Raas Sumenep, Madura. Saat ini sedang menempuh Pendidikan Pascasarjana di Universitas Maulana Malik Ibrahim Malang, Fakultas Ekonomi Bisnis Islam. Beberapa karyanya pernah di muat media online dan cetak. Penulis bisa dihubungi melalui surel, negerikertas, nolesa.
santrishopies@gmail.com
0 Komentar
Andai bisa klaim Honor untuk karya puisi dan cerpen yang tayang sejak 1 April 2024